Tuesday, August 28, 2007

قاموس الروشنة الجزء التانى

حــــرف البـــاء
بيرمى ودن
عبارة بمعنى انه يتصنت على شئون غيره بتوجيه الرادار الملقب بالأذن لأثنين يتحدثون سرا لكى يفسر الكلام الهامس
بكابورت
صفة تطلق على الروائح الكريهة الصادرة من فم شخصا ما وهى دليل دامغ على ان هذا الشخص مقزز لدرجة خيالية
بح
تأتى بمعنى أن شئ ما أنتهى وغالبا ما تأتى فى جملة " بح خلاص كان موجود وخلص"اى ان ما ترغب فيه لم يعد متاح الان
ولقد اشتهر هذا اللفظ مع المبدعة "ذكية زكريا"
ببخظه وعرانيسه
تدل على الجودة بصفة عامه يعنى بكامل هيئته
بشلة
علامة على الوجه ناتجة من المشاجرات واحيانا تدل على ان الشخص الذى تشوه وجهه "بلطجى أرارى" اى معتاد على اعمال البلطجة
وولقد استخدمها الفنان محمد سعد فى فيلم الناظر مع الفنان علاء ولى الدين عندما قال وهو يعلمه الصياعة
"أنت كده تمام يا ابو صلاح ناقصلك يشلة ختم الصياعة وتبقى معاك الشهادة"
باكس
مصطلح بمعنى الخايب ..... العبيط ..... الذى يمكن خداعه بسهولة " يا باكس " نداء بغرض الاستهزاء بالشخص الموجه إليه النداء ويجهله الجميع.
باشكا
امصطلح بمعنى ألعب بأوراق مكشوفة. أو بطريقة واضحة وغالبا ما يستخدم اللفظ فى الكوتشينه ويقال "العب باشكا" اى العب ع المكشوف
باترينا
لفظ يطلق على الشاب او الفتاة التى ترتدى نظارة
بروبجندا
هى كلمة انجليزية وهى مصطلح فى لغة الروشنة بمعنى التشهيير ويقال "عاملى بروبجندا" اى جامع الناس حولك وتفضح اسرارى .......... والكلمة إنجليزية فى الاساس بمعنى دعاية
بيظيط
لفظ بمعنى النطق بكلام فارغ ..... والشخص الظايط هو المعتوه الذى يردد كلام لا يفهمه غيرة مثل عبيط القرية وتقال " ما تظيتش يا عم" وتعنى لا تدوش دمغنا بكلام فارغوتأتى كلمة "ظيته" أيضا بمعنى دوشه أو همجيه فى التعامل
بتخبط فى الحلل
عبارة بمعنى "انك تفضح سرى" وذلك يسبب لى اهانة .مثال " انت بتخبط فى الحلل يا كابتن" اى اهنتنى وسوف يكون على عقابك
برطعه
لفظ بمعنى "أكل ومرعى وقلة صنعه" أى يسير فى الحياة بدون هدف أو غايه وتقال " ماشى فى الحياة بيبرطع" اى بلا افكار محدده بشكل منظم أو يعيش بعشوائية أو يعيش متواكل على الاخريين
بأف
وهو الشخص قليل الفهم او الاستيعاب والذى يتصرف بعفوية نادرة لا تخرج حتى من حيوان أليف
بيجيب لورا
عبارة يقولها شاب لصديقه عندما يتراجع شاب عن موقفه الذى أيده.. والتراجع نتيجة ضغط أو أعادة تفكير فى الوضع الحالى
بلط
وهو الشاب الذى يحتوى على المادة السحرية التى تصنع منها الرخامة والغتاتة والشاب البلط هو المركز الرئيسى أو التوكيل الرسمى لهذه المادة السحرية
بونو
لفظ بمعن حلو ... أو جميل .... وبونو بونو هو اسم فيلم لنجمة الجماهير نادية الجندى
بستفه
وهى الاهانه لدرجة المسخرة "مسخر بكرامته الارض" أو "أنا بستفت فلان" أى وجهت إليه كلام لوم شديد اللهجة على غلطته

19 التعليقات:

كووووووووول يامان

اشطه بالهبل وخليك وحش ومتبقاش جحش وقول رايك وعيش ياعبد اللطيف

مع تحيات
مهبول

مهبول
تمام ياباشا
شكرا على تعليقك ياباشا
يلا بقا نهبل

معظمهم كالعادة اول مرة اسمعهم
مش عارفه انا عايشه كده ازاى من غير مااعرف المعلومات الخطيرة دى
بس يعنى طلعت فى الاخر باترينا

ههههههههههههههه
ماشى ياياسمين
بجد وجودك اسعدنى
والحمد لله ان احنا قدرنا نقدملك ثقافة عامة

ربنا يخليك وتثقفنا كمان وكمان
بوست جمييييل

تحياتي

بلفه..تقال لواحد ضحك على واحد فى الكلام
بدره..تقال لواحد اتكلم مع واحد متعصب قوى وخلاه هادى
بريزه..صغيره عشره جنيه كبيره مائه جنيه
بق..للشخص اللى يشتم وميعرفش يتخانق
نقول كمان ؟؟؟

شكرا روفى واى خدمة

اما انتى يابهلولة
نعمل قثقاموس مع بعض عادى يعنى

رغم انى الواحد بطل الحجات دة من ساعت ملتزم
بس لو عوز مصطلحات اكتر من كدة انزل الساغه او سوق السمك
المدونتى نورت بيك يا ريس
احمد الجيزاوى

تسلم يااستاذ احمد
على تشريفك ليا فى مدونتى
الزيارة اللى انا سعيد بيها جدا

بعد السلام عليكم

واضح أن المصطلحات عاملة معاك شغل عالي ، اللهم لا حسد

ولكنك تستحق ياأبو حميد

تحياتي

جميل القاموس ده ومفيد لأن انا بقع في مواقف كتير وبسمع كلمات من دي وببقى مبلم لأني مش عارف المعنى لكن من هنا ورايح اديني اتعلمت اللغة

وياريت لما توصل حرف التاء تضيف كلمة توريث لأنها جديدة وعايزةتوضيح للناس


حــنــظــلــة
http://7anzala.wordpress.com

ابو صلاح :تسلم ياجميل
على مرورك

الاستاذ محمدود
تشرفت بزيارتك ليا ياباشا
ويارب تكون
المدونة عجبتك

على فكرة بيرمى ودنه دى اسكندرانية متهيألى
بس انا معرفش ليه ساعات بحب استخدم الكلام ده
او ع الاقل اللى اعرفه منه
وساعات اتزنق فى معنى ومالاقيش غير الفصحى
فتلاقى لغتى خليط كده بس انا بحب عامية ولاد البلد وبحب لغة القرآن وكان الحل هو الميكس ده
افدتنا يا ريس
سلام

أنا عن نفسي يا زهقان استفد من المصطلحات ويمكن أول مره أشوف معظمها , تمنياتي لك بالتوفيق وان شاء الله عما قريب ستغير العنوان إلى أنا فرحان بالحرية وبيكي يامصر

ما انت روش اهو ومش زهقان يعنى
ربنا يكرمك ومتزهقش بقي

مريم
طيب حلو ان الواحد فاد المجتمع بحاجة
هع هع هع 3هع

وشكرا على مرورك الكريم دا

ان شاء الله
ستغير العنوان
عما قيب
وشاكر مرورك

ايون مانا بحالو
اطلع من جو الزهق دا

واخفف عن الناس
الهموم اللى شايلاها
مش كله حاجات تزهق تزهق
اوك
هع هع هع 3هع

Post a Comment

شوف انت عاوز تقول ايه

Twitter Delicious Facebook Digg Stumbleupon Favorites More