كــــــــــن مـــع الثــــوره

أبـــتــديــنــا يـــوم .. 25 .. يــاتــرى هــنــكــمــل.

انـــا مــصــرى انـــا حـــــر

وشرفك يا بلدى لتبقى يا بلدى حياتك هيا عمرى وقدرك هوا قدرى حرية على طول الزمان حب حب وسلام فى أى مكان ؟؟.

ثــــــورتـــــنـــا ســـلــمــيــه

وشرفك يا بلدى سحابة وتعدى وبرضة أنتى بلدى مهما عملوا يا بلدى فيكى أحنا ليكى احنا بيكى دا أحنا ياما خدنا منك ... فيها أية لو يوم نديكى .

ثـــــــورة شـــعب ... ســـلـــطـــة شــــعب

فــــى انـــتـــظار 25 يـــنايـــر 2012.

مــــيــدان التـــحـــرير

هـــــنا اتـــــولــــد حــــلــــمــــنــــا.

Friday, February 17, 2012

صرخات من داخل الجامعة


بعض الكلمات التى خرجت من قلب صديقى 
والتى لم اجد لها اى تعليق لدى
لما فيها من صدق 
وحب وافر وتضحيه كبيره
من اجل الوطن

مع كلمات صديقى الذى شارك فى اضراب طلاب مصر
فى مقدمة جامعته




** صرخات من داخل الجامعة

هذه الصوره جعلتنى اكتب ما بداخلى .. لما رأيته فيها من غضب وحزن وقوة .


خرجت الكلمات عفوية منا حاملة ما بداخلنا من مشاعر صادقة ... كنا نشعر ان كل خلية من خلايا اجسادنا تهتف , فلقد فاض بنا 

الكيل لما نراه بأعيننا , ويغمض البعض عينة عنه ولا يريد ان يصدق رغم وضوح الحقيقة اما عينة .

فماذا تنتظرون منا بعد هتك العرض واستباح الدماء , ولماذ لا يعرف الاخرون الذين يطلقون علينا (البلطجيةوالمخربين والعملاء ....

) ان جيلنا الذي شاهد الثوره بعينه وشارك فيها لم يسكت ولم يغمض عينه حينما يري الباطل ويشعر بالظلم .

افلا يعلمون ان ضمائرنا لازالت نقية ولم تلوث بعد بفساد واسلوب النظام السابق ؟! افلا لا يعلمون ان من جازف بحياته و وضعها 

على كفية لن يخضع ولن يركع ثانيا ؟!

احترمو تفكير وعقول جيل ولد ليكون حرا .. فنحن من سنبني مصر القادمه بايدينا وعقولنا الطاهره .

بقلم

- محمد الجزار

Wednesday, January 25, 2012

ثــورتــنــا مــســتــمــره



هنفضل مكملين

..وثورتنا مستمره

بعنينا شايفين

...بلدنا حره

اللى خاين

..مالوش مكان بينا

بنحب البلدى

..وهنموت عشانها

..ولو مليون مره

احنا شعب

..قلبه مات

كرهنا الخوف

..بطلنا سكات

هنفضل نطالب بحقنا

حق مينا والشيخ عماد

علاء وغيره

..وست البنات

واللى مات يقول

..تحيا الثوره

هنفضل مكملين

..ثورتنا مستمره

المعلب ملعبنا

..هنفنن ونهدس

قولوا علينا

..عميل مندس

مهما تقولوا

ميهمناش

وهيعلى صوتنا

..يااحنا ياالمجلس

..واطلع بره

بعنينا شايفين

..مصر حره

بنوصل رساله

..هتعلى لفوق

بتقول للمجلس

..اصحى وفوق

حريتنا هى املنا

كرامتنا ومستقبل عيالنا

ولطعم الحريه

..لازم ندوق

فيها ايه لما

نموت عشانها

..ولو مليون مره


هنفضل مكملين

..وثورتنا مستمره

بعنينا شايفين

...بلدنا حره

اللى خاين

..مالوش مكان بينا

بنحب البلدى

..وهنموت عشانها

..ولو مليون مره


Monday, January 23, 2012

عــــمـــو الـــمـــشـــير ....!!؟




عمو المشير .. ؟

قريب جدا هتكون جدو

تلحق تطير

ع اللى كان قبلك

..فى طره

انت واللى حواليك

..تتهدوا

قبل ماتوقعونا

..فى الخره

زمانك دلوقتى بتسأل

دول مين دول

..ياترى

احنا اللى هنصرخ نقول

..حقنا

حق الشهيد اللى مات .

حق

اللى كانو قبلنا

خلاص مفيش سكات

يلا مكانكوا

..مش هنا

..مكمليين

ولميدانا راجعين

نرسم بسمة امل

من جديد

..صامدين

على هدفنا عازمين

ان شالله نفوت

..ف الحديد

..مستمرين

لاخر نفس قادرين

ولثورتنا من جديد

..هنعيد


Thursday, January 12, 2012

الــى كــل مــعــارض لـلــثــوره


الى كل معارض للثوره

أدعوك الى ان تنظر حولك ، ولاتنظر الى الظاهر فقط بل انظر الى باطن الامور
فستجد مايجعلك ان تكون من اكثر المؤيدين للثوره ، وليس معارضيها
هناك الكثير والكثير مما يجعلنى مؤيد للثوره ومدافع عنها بكل مااملك واضحى بدمى وبروحى من اجلها لامجال لذكرها جميعا لاننا لو اطلقنا العنان لذكرها فسوف يطول الكلام ونجد اسباب لاتعد ولاتحصى ولكنى اكتفى بذكر القليل منها

ثورة 25 يناير


  • جائت لتجعل مصر اجمل مكان لتتذوق وتنعم فيه بطعم الحريه بدلا من تذوق طعم القيود
  • جائت لتوفر لقمة عيش للمصرى اللى كان مش لاقى ياكل وبيشحت م البيوت لا دا وصل بيه الحال انه ممكن ياكل من الزباله والنظام السابق لايعنيه اهتمام ، فكانت اول كلمه نطقت ف الثوره
    << عيش >>
  • جائت لتحقق العداله الاجتماعيه التى سعى اليها الكثير ولكن دون جدوى .. فكان فى مصر اللى فوق فوق واللى تحت بياكله الفقر والظلم وتيهة الزمان فجائت لتسوى بين الناس جميعا وترفع راية
    << العداله >>
  • جائت لتنقذ مصر من تحويلها من دوله الى مملكه فأنقذها من الحلم الاكبر الا وهو
    << التوريث >>
  • جائت من اجل الاستعباد الذى كان يمارسه المخلوع ومد فترات رئاسته لتصير 30 سنه ولم يقل
    << كفايه >>
  • جائت من اجل ان تقول كلمتك وحقك فى اختيار رئيس بلدك اللى يمثل ويكون منتخب من افراد الشعب
  • جائت لرفع الاهانه والظلم والاستحكار والاستعباد من على عاتق المواطن المصرى
  • جائت لتقول لأ للمحاكمات العسكريه للمدنين وكل مايمارس من انتهاكات ضد الشعب والزج فى السجون بكل صاحب قضيه ومن له رؤيه ورأى وفكر يهدف لدخول مصر بوابة التقدم والديمقراطيه والحريه
  • جائت لتطهير مصر من الفساد الذى قد اتخذها موطنا يعيش فيه منتشرا بين كافة انحائها
  • جائت لتطهير الداخليه من رجالها المستبدين الذين استغلوا السلطه والنفوذ فى قمع المصريين ، فجائت لتغيير مهام الداخليه من خدمة النظام الى خدمة الشعب حتى نرى الضابط المصرى المعتز بمصريته قبل أى شىء اخر
  • جائت لتقتلع جذور الايادى المتسلطه ذات النفوذ من باطن مصر لكى ننعم بخيرها
  • جائت لتخليصنا ممن اتخذ السرقه منهجا له مستترا خلف قناع الرجل المكافح والمناضل الوطنى
    وزى ماقال حسين الجسمى << هنا حرامى عامل عصامى عامل فيها للشرف محامى >> فى اهل كايرو
  • جائت لتطهير اجهزة الاعلام من القيود التى كانت تكبلها وتمنعها من نشر الحقيقه وتطهيرها من الايادى المواليه للنظام وجعلها وسيله وأداه ضد الظلم وليس وسيله واداه لفرضه
  • جائت لتغيير الحكومات التى اصبح فيها الوزير مختوم بثلاث اختام
    << ختم رجل الاعمال - ختم لجنة السياسات - ختم العواجيز >>
  • جائت لتنقذنا من استبداد ونظام الحزب الواحد والذى دنس رجاله ولوث كباره الحياه السياسيه فى مصر حيث اصبحت ارضا خصبه لينمو فيها الطغاه
  • جائت لتجعل صوتك فى الانتخابات لايقدر بثمن ويتحكم فى من تريد ان يمثلك فى المجالس النيابيه ، بعد ماكان معروف ثمنه 50 او 100 جنيه وتخلص ، بالاضافه الى ان النتيجه تحسم من قبل اجراء اى انتخابات فى الاصل
  • جائت لترفع من كلمة مواطن مصرى فى اى مكان فى العالم وترفع لها القبعه كلما ذكرت
  • جائت لتجعلك تفخر بكونك مصرى وجعلتك تردد << لو لم اكن مصريا لوددت ان اكون >> بعد ماكنت تناسيت مصريتك
  • جائت من اجل تعليم افضل ليك ولادولادك ولاحفادك من بعدك من بعد ماكنا ندرس طلاسم لاتثمن ولاتغنى وما كونها الا حفظ لامجاد النظام
  • جائت من اجل مستقبل مشرق لكل المصريين
  • جائت لتطوير البحث العلمى فى مصر بعد ماكان متعمد دفن كل من له ملكه فيه ويدفعونه للبحث عن فرصه فى الخارج
  • جائت من اجل مشاركة الشباب فى الحياه السياسيه بعد ماتعمد اقصائهم وطمس دورهم ، من بعد سيطرة العواجيز على اركان الدوله حتى اصبحنا نسمى << بدولة العواجيز >> وتناسينا ان البركه بالشباب
  • جائت تقول للبطاله بالفم المليان لأ احنا عاوزين نشتغل ، بعد ماامتلأت القهاوى بالشباب واصبحت مقرا رسميا لهم
  • جائت لاستصلاح كل بقاع من بقاع مصر فى كل ماهو نافع ومفيد
  • جائت لتقول لا للفتنه الطائفيه والتى كانت يبتدعها رجال امن الدوله وتثبت اننا جميعا مسلمين او مسيحين من نسيج المجتمع المصرى لايمكن ان نفترق
  • جائت من اجلك انت لتصبح ماتريد انت ، لاتصبح مايريدون هم

اّ مل ان تكون اخى المصرى المعارض للثوره ان تقتنع بها ، وان لم تقتنع فاأترك من اقتنع بها يكمل المشوار

ولاتتهمه انه غير محب لبلده وتطعنهم فى شرفهم

اتركه وشأنه

يموت من اجل مايؤمن به أفضل من ان يموت بلاهدف ورؤيه

انا عارف ان انت فى نظرك ممكن تكون الثوره جابت خراب لمصر لكن اسمحلى اقولك ان دى نظريه ضيقه وبعيده كل

البعد عن ثورتنا لأن من احدث هذا الخراب هو من لايريد ان الثوره تشوف النور

وبيحاول اجهاضها بكل طريق ممكن ومحاوله للعب فى دماغ حضرتك لاقناعك بعكس ماتجنيه الثوره

و عارف كمان انك ممكن تقول على كلامى كلام جميل لكن كتير منه محصلش ولازم نهدى عشان نحقق دا

احب اقولك لأ دا هنحققه باللى احنا مازلنا بنعمله احنا قطعنا رأس الافعى وجزء من الجسم لكن لسه في موجود باقى الجسم والديل

بيلعبوا وهما السبب ف اللى انت بتقول عليه دا ومخليانا منحققش باقى اهدافنا

عشان كدا احنا مكملين وراجعين تانى لكل الميادين عشان نقلع جذور الفساد كلها عشان ميكونش ليها مكان وسطنا

عشان كدا نازلين يوم

25/1/ 2012

من تانى مش عشان نحتفل لأ عشان نكمل اللى بدأناه لسه المشوار عليه شويه لازم نمشى فيه للاخر

هنتعب بس مش مشكله هنرتاح بعدين لاننا متأكدين ان احنا صح وهننتصر

لازم نغطى على كل واحد يحاول انه يغمى عيونا عن حاجات كتير

وانا ذكرت الاسباب اللى هتخلينا ننزل يوم 25 الجاى

فى تدوينتى الاخيره

رساله الى عزيزتى مصر

اقراها واعرف يمكن تغير رأيك

وارجع واقولك من تانى لو مكنتش نازل معانا سيبنا فى حالنا

احنا نازلين نكمل اللى بدأناه وحدنا

واحنا واثقين من ان ربنا واقف معانا لان كل اللى بنعمله لوجه الله وعشان خاطر بلدنا لا عاوزين منه سلطه ولاجاه ولا اى حاجه

غير اننا نشوف مستقبل مشرق لمصر ينعم فيه ابنائها

بـــــالــــــحــــــريـــــــــــــه

Sunday, January 8, 2012

رسـالـه الـى عـزيـزتـى مـــصـــر


مصر العزيزه

انا شاب من ضمن شباب كتير بيحبك وصل حبهم لدرجة العشق لدرجة انهم يموتوا عشانك
لدرجة انهم يضحوا بكل حاجه عشانك .... لدرجة انهم بيقدمولك عيونهم وميشوفوش عشان تشوفى احبابك
وتعرفى مين بيحبك ومين باعك

عزيزتى مصر

احنا شوفنا ان فى ناس كتير بتهينك .. ومن قلوبهم شيالينك .. شوفنا ناس بتاكل فى خيرك ... شوفنا ناس بتبيع فى طينك
شوفنا ناس كتير بتخرب لحد مابقيتى محلك سر
شوفنا ناس كتير انتى مش هماهم وكل همهم بس نفسهم ... ويحوشوا ف بطونهم م السطله اللى انتى ادتيها لهم

عزيزتى مصر

شفنا انتهاك كبير للى بيحبك ... للى بيقول كلمة حق فيكى ... للى بيقول < لأ > علشان خاطر عنيكى
شفنا فيكى مفيش مكان للفقير ولامكان لموظف عنده ضمير ... كلهم بيتاكلوا ف الرجلين وذنبهم ان فيكى الكبير كبير

حبيبتى العزيزه مصر

لما شوفنا دا كله فيكى .. وحاجات غيرها كتير تأثر عليكى
ومفيش ولا ( عيش ولا حريه ولاعداله اجتماعيه ) قررنا
نـــــــــــــــصرخ
بأعلى صوتنا ونقول << لأ >> وانقذوا مصر
أنقذوا مصر م الطريق اللى هى ماشيه فيه ... طريق الحرامى والبيه

عزيزتى مصر

ف يوم 25 يناير 2011
جمعنا نفسنا شباب بيحبك ... ونزلنا الميادين نهتف بأسمك
<< ياأحلى اسم فى الوجود يامصر >>
<< الشعب يريد اسقاط النظام >>
<< عيش - حريه - عداله اجتماعيه >>

قولنا لكل حاجه غلط لأ .. وعلينا وعلينا الصوت .. عشان الحق جوانا عمره ماهيموت
قولنا لازم نجيب حقك وقد كان .. وقعنا الراس الكبير والأعوان .. وديول نظامه .. والواد الصغير البهلوان
اللى كان نفسه يبقى ريس ... ويخرب فيكى كمان وكمان


عزيزتى وحبيبتى الغاليه مصر

دا كله بعد ماناس كتير كانت مابينا ضحوا بروحهم وقدموها ليكى عشان تعيشى
ناس كان شايلين كفنهم على اديهم وبيقولوا تحيا مصر
ناس وقفت فى وش الشرطه اللى كانت للأسف ضدنا عشان وزيرهم اللى كان بيلحس نعل جزمة كبيره

ولارجالة البهلوان ... اللى نزلوا ف كل الميدان .. كل واحد فيهم قال ايه راكبلى جمل او حصان
أصل الامر صدر لهم يخلو الميدان ... هأأوأو يابلهلوان
بس ايه دا كان بعده

والشرطه اتسحبتوا وأستخبوا ف بيوتهم ... والاقسام والمراكز ولعت من جبروتهم
اللى كان على ناسك ... والجيش نزل وقال احنا ياثورة مصر حراسك
وهتفنا وقولنا
<< الشعب والجيش ايد واحده >>
والمجلس العسكرى مسك البلاد ... وعمال يقول وعوود وبالثوره قد أشاد
قولنا خلاص البلد هتتحسن .. ونضفنا الميادين ورجعناها للأحسن

لكن الوعود صبحت مفيش ... ونلاقى ثوار بيتعملهم فيش
وكشف عذريه وقلة ادب بعد كدا متلاقيش
ووعود كل يوم وكلام ... والكلام بيسيح قبل ماانام

شوفنا احداث كتيره من مسرح البارون لماسبيرو لشارع محمد محمود لاحداث مجلس الوزراء
ويموت شهيد والتانى ... عشان شايفينك لسه بتعانى
ويموت علمائـك .. ويموت شبابك ... عشان حلمهم يفتحوا بابك
يفتح بابك للحريه ... ويشوفك طالعه لفوق طلعه قويه
من مينا لعلاء للشيخ عماد ... لعزه وسميره وست البنات
وغيرهما كتييير ياما
كلهم مش فارق معاهم ... يتهانوا ولايضربوا ولاحتى انه مات ... لكن نفسه يشوفك احسن بلد فى الدنيا
ويدوق طعم الحريه ف كل مكان فيكى
لكن برده العسكر بيخلف وعوده ويوم ورا يوم بيزيد فى نقيضه
وكترت الاتهامات ... من خاين لـ عميل هيهات هيهات
عملوا كتير وقصروا ف حقوقنا
قصروا ف دم الشهداء ... ومبيحاكموش اللى كان السبب ... وبيقولوا كمان دول ابرياء
واللى زاد وغطى انهم اتبعوا نفس مناهج الكدب والخداع والرياء
وللأسف وقع كتير ومات كتييير م الورد اللى فتح ف جناينك
نحتسبهم عند اللى شهداء

وطلعت صرخات من الكنيسه والازهر
<< يسقط يسقط حكم العسكر >>
وقولنا من تانى راجعين ... عشان لسه يامصر شايفين ... ابنك مش واخد حقه .. وبيتهان وبيتسب له الدين

راجعين نقول للظلم لأ ... راجعين عشان مبقاش فيه سكات
راجعين يامصر لكل الميادين من تانى .. عشانك يامصر وعشانى .. وحق اللى مات

يا مــصـــــــــــر

يوم 25 يناير 2012
هنقول ...... الثوره مستمره
.. مطالبنا موجوده والحياه اعبائها بتكتر .. وكمان هنقول

<< يسقط يسقط حكم العسكر >>

ميعادنا يامصر يوم 25 يناير 2012.. بعد سنه من موجة ثورتنا الأولى هنقول
احنا لسه موجودين .. طول مافينا نبض هندافع عن حقوقتنا وحريتك يابلدى ليوم الدين
نازلين نقول
<< الثوره مستمره >>

ومتقلقيش يامصر ولادك موجودين

انا أسف يا مصر

انا عارف ان رسالتى طولت وقلبت عليكى مواجع كتير بس غصب عنى كنت لازم اقولك
ان ولادك لسه فيهم نفس ومصممين وصامدين عشان يدوقوا طعم الحريه
لسه فيهم مكان فى جسمهم للرصاص ... لسه فى جسمهم دم
ولأخر نقطة دم هيحبوكى ... ولسه رافعين رايتك لسه محافظين عليكى
احـــــنا ولادك يا مــصــر



يــــا مـــــــــصــــــــــــــر شكرا

ان قلبك اتفتحلى عشان اقولك الكلام دا كله ... بس ف نهاية رسالتى احب اقولك

<< بحبك يامصر لاخر نقطه ف دمى ولاخر نفس جوايا >>












Saturday, January 7, 2012

صـــرخــــة طــمــوح




<< الندم مبينفعش اللى حصل حصل >>

كلمات بتتردد على لسانى على طول
عشان من هبلى بندم على حاجه عدى عليها 4 سنين
انا عارف ان << عسى ان تكرهوا شيئا وهى خيرا لكم >> وكمان
متأكد ان ربنا شايفلى الخير فى الطريق اللى انا مشيت فيه مرغم
ورغم ان انا اثبت كفائتى ف الطريق دا لكن برده الكلمات دى مازالت بتتردد
لأ وكمان زادت الايام دى

لكن الحاله اللى انا فيها دى مجرد تقليب فى ذكريات طموح مختلف عن
الطريق اللى انا مشيت فيه
وطموحى القديم دا متعارض معاه بشكل كبير

كان فى ثمره جميله وليده جوايا
كانت ممكن انها تعمل حاجه وتاثر خصوصا فى الايام اللى عايشنها حاليا
لكن للأسف طريقى اللى اتفرض عليا
اجهض الثمره اللى كنت بحبها
وكل ماأحاول اجددها مكملش لأنى مش قادر استمر ف تجديدها
بس انا بحاول فيها وهفضل احاول عشان اجددها من تانى

<<لعل طموحى القديم يعود فى وقت انا بأمس الحاجه اليه >>

لكن يفضل اللى انا بقوله دا مجرد

<< صرخة طموح >>
بالاه تتكلم تعلى وتعلى وفى الاخر متلاقيش حد يسمعها
الا صوت واحد بس
وبيقولها

<<
اصحى فوقى طريقك مش هنا>>

ترجع مكانها وتنام لمده طويله اوى
وبكون مستنى الحاجه اللى تقدر تصحيها من تانى

** اعذرونى كانت تنفيسه جوايا كانت لازم طلع عشان مفرقعش **



Friday, January 6, 2012

فى انتظار 25 يناير 2012


التدوينه دى مش هعتبرها رساله من المواطن الزهقان
لا انا هعتبرها << رسايل >> صغيره ومقتطفات
ممكن تعتبرها مضحكه وممكن تعتبرها اى كلام
وممكن تعتبرها جاده اوى وهادفه
وممكن تعتبرها من النوع

<< هم يضحك >>


بس ف الاخر
وانا قاعد ومستنى 25 يناير 2012

بكتب

1- ينــــ 25ـــــاير2012 مش احتفال ... ينـــ
25 ــــاير 2012 دا حق اجيال

2- اللى قاعد ف بيته وبيشتم ف الثوره وشباب الثوره عامل زى << البغبغان >> اللى بيردد الكلام وهوه فى << القفص >> ومش عارف هوه بيقول ايه

3- عزيزى حزب الكنبه ... انت عامل زى الفرخه اللى مش عارفه تبيض وشايفه غيرها بتبيض وبتفقس بيضها وبتطلع كتاكيت كل كلامهم وحلمهم << عيش - حريه - عداله اجتماعيه >> ... فعلا كتاكيت بطعم الحريه

4- الاخوان عاملين بالظبط زى الفرخه اللى باضت بيضه مع بقية الفراخ وسابت غيرها تنام عليها وتفقسها ودا كله عشان شافت ديك عجبها ومشيت معاه ... اصلها مش عارفه ان الديك هيديها ف الاخر

انا بقول افكنى من جو الفراخ دا انا حسيت نفسى بقيت توفيق عكاشه

5-طول ماهدفنا قدامنا واحنا ماشيين على الطريق - هنوصله - لكن لو واحد مننا شاف مزه معديه وبحلق فيها هيروح بتفكيره لحتة تانيه خالص وهيتوه عن اللى عاوز يوصله .. << واحب اقوله المزه مش دايمه >> .. وكل لبيب بالاشارة يفهم


6- طول مافى اللى زيى وزيك.... مصر هتطلع لفوق .... بس طول مافى اللى زيه وزيه .... مصر برده هتطلع لفوق .... لان وقتها هيكونوا ماتوا من غيظهم لأن مفيش بينا مكان لعبيد


7- اتكلم والله مش هيجرالك حاجه ... لكن لو فضلت ساكت فعلا هيجرالك حاجه لما تفرقع وانت شايف انك ملكش لازمه وغيرك بيجبلك حريتك اللى انت متستهلهاش


8- احنا مبنعبرش على الشعب المصرى ... ولا السرايا الصفرا بتعبر عن الشعب المصرى
لكن مينفعش تقارن بين واحد عاقل ... وواحـــــــــد مــــــــــجــــــــنــــــــــون

9-
في سكة زمان صامدين في سكة زمان

في نفس الميدان راجعين في نفس الميدان
لا حقوقنا بترجع يامصرى ولا ننسى حق اللي كان قبلى
<< على انغام موعود >>

10- فى ظباط سواء شرطه او جيش فيهم العبر .... بس فى ظباط تانيه
نفسهم يكونوا ف قلب الميدان .. بس اكتفوا بأضعف الايمان
مع الثوره بقلبهم .. وبيتكلموا بس بشويش
<<فرحان بيكوا اوى >>

11- بفرح اوى لما اشوف عيال صغيره بتلعب وبتضحك
بحس ان جيلنا عملهم حاجه هيقدروا يعيشوا بيها حياه كريمه
بس اللى احنا عملناه دا ناقص نقطه ... ولازم نحطها


ومازالت رسايل انتظار 25 يناير 2012 تتوالى



Twitter Delicious Facebook Digg Stumbleupon Favorites More