كــــــــــن مـــع الثــــوره

أبـــتــديــنــا يـــوم .. 25 .. يــاتــرى هــنــكــمــل.

انـــا مــصــرى انـــا حـــــر

وشرفك يا بلدى لتبقى يا بلدى حياتك هيا عمرى وقدرك هوا قدرى حرية على طول الزمان حب حب وسلام فى أى مكان ؟؟.

ثــــــورتـــــنـــا ســـلــمــيــه

وشرفك يا بلدى سحابة وتعدى وبرضة أنتى بلدى مهما عملوا يا بلدى فيكى أحنا ليكى احنا بيكى دا أحنا ياما خدنا منك ... فيها أية لو يوم نديكى .

ثـــــــورة شـــعب ... ســـلـــطـــة شــــعب

فــــى انـــتـــظار 25 يـــنايـــر 2012.

مــــيــدان التـــحـــرير

هـــــنا اتـــــولــــد حــــلــــمــــنــــا.

Sunday, October 12, 2008

وربنا الناس دى بتقول كلام زى الفل

سلام عليكم

كل سنه وانتو بخير

وعيد خلص ونستنى بقه عيد الاضحى

بس ندخل فى البوست بشوف فى اماكن كتير جدا مواضيع اسمها تقدر تقول عيوب نفسك

وتلاقى واحد يدخل يقول اه انا اقدر نستنى يقول عيوبه تلاقيه يقولك انا طيب اوى وحنين جدا ورومانسى ولما بحب حد بخلص ليه

واحده تانيه تقولك انى حساسه اوى اوى وممكن اعيط من اقل حاجه حتى لو شوفت صرصور صغنون بقعد جنبهواعيط

وف يوم من الايام قولت هاكون صريح مع نفسى واقول عيوب نفسى اللى نفسى اتخلص منها فا قولت انى زى كل بنى ادم بغلط وبتوب

وبغلط وبتوب الحمد لله انى ليا قلب يخلينى اتوب اه ساعات كتير اكلم بنات كتير جدا وساعات تانيه مش بكلم بنات ولو ارتبط بواحده وقالتى

متكلمش بنات حتى لو صداقه اكيد مش هاكلم

وقولت كمان انى فى الصلاه ساعات كتير بكون مقصر جدا وساعات تانيه بحافظ بس ربنا مش عاوزنا ساعات وساعات

وكمان عصبى وكمان متسرع وقعدت اقول فى عيوبى حسيت انى صغرت فى نظر الناس اللى بكلمهم اوى

بس حسيت انى كبرت فى نظر نفسى اوى لان انا على حد معلوماتى القليله فى الدين ان من اهم اسباب التوبه انك تعرف الزنب وتندم عليه

واهم حاجه تعرف الذنب ومعرفه الذنب بقه ياااااااااااااااااااااه انا شايفها اجمل شى فى التوبه لما تعرف عيوبك هاتعيش عارف مقدار نفسك

هاتشوف عيوبك بتطلع امتى وفين وليه وساعاتها هاتحل مشاكلك وعيوبك مش هاتقعد فى المكان اللى بتطلع فيه ولا الوقت والسبب اللى

بتطلع فيه عيوبك الناس بتخاف تقول عيوبها بجد ادام الناس يقولك ياعم انا الناس راسمين ليا صوره حمصيه بلاش اهزها بس انا بقه

صريح وشايف وبحترم وبعز وبقدر اللى يعرف الذنب ويعترف بيه حتى لو لسه مش تاب منه لان اكيد بدل عرف الذنب وحتى لو الشيطان

سهله انه يرتكب الذنب ده هايجى يوم ويبطله انما لو عايش وقالك عادى دى مش عيوب اشطا جدا الحياه لذيذه والناس بتحقد عليا وبيقول فيا

حجات مش فيا يبقى ده ايه مش عاوز حد يدخل يقول عيوبه اودام الناس علشان برستيجك بس اقعد مع نفسك وشوف عيوبك وقول انا بعمل

كده ومكسوف من الناس مابالك برب العالمين ووقتها هاتبقى من غير عيوب بس يمكن ترجع لها تانى لان كل ابن ادم خطاء وخير الخطائين

التوابين اخطا وتوب لحد ما تموت بس اهم حاجه تموت وانت تايب وده بيجى بقه باخلاص النيه لله ولما حد يحب يقولك عيوبه متقعدش تقوله

يخرب بيتك والله نحسبه موسى يطلع فرعون لا قبل ما تتكلم بص لنفسك وشوف عيوبك وقوله يا اخى ربنا يتوب عليا وعليك كلنا اصحاب

ذنوب ولازم نتوب وعيش وعيشها سلام

واحسبها صح.....هتعيشها صح

Tuesday, August 26, 2008

تاااااااااااااااااااااااااج



جالى تاج من مدونة

طالب مصر

احمد شرف


بدأت التدوين من امتى ؟ودخلت العالم ازاى؟


دخلت التدوين من سنه ونصف ودخلت عالم التدين

بالصدفه

ومااجملها صدفه!


ايه كانانطباعك فى البدايه؟


كنت حاسس انى معرفش اى حاجه ف اى حاجه

وكنت كئيب نوعا ما لان مكنش حد بيزورنى خالص


مين اكتر واحد بتهتم بتعليقه على البوست بتاعك الجديد؟


مفيش حد معين يعنى


ايه اهم حاجه اتعلمتها من التدوين؟


ان احنا مادان قبلنا نعيش الحياه

فنعيشها واحنا رافعين راسنا

وقايلين اللى جوانا من غير خوف او تردد


ايه اكتر حاجه كرهتها؟
مفيش حاجه تذكر تقريبا


حاسس ان التدوين له تاثير؟


اه طبعا المدونين بدأوا يظهروا ع الساحه السياسيه

بطريقه رهيبه وقدروا انهم يوصلوا صوتهم عالى اوى

وقدروا انهم يكونوا ايد واحده والدليل

جزئين من كتاب

مدونات مصريه للجيب


تهدى التاج لمين؟


انا مبحبش ادبس حد

اى واحد عاوز ياخده يتفضل




Monday, August 18, 2008

اخرتها هتبقى وحشه اوى

ازيكووووو ..عاملين ايه
انهرده لاقيت الجو الصراحه يشجع ان الواحد يكتب كدا و نفسه مقفوله هع
المهم نخش فى الكلام
بتلاقى حد يسمعك؟
مشكله جيلنا عامه اننا مش بنلاقى حد يسمعنا ابدا من الاجيال اللى اكبر مننا
و ده سبب معظم مشاكلنا اللى بنتعرضله
او حتى لما نيجى نناقش حد من الكبار قليل اوى اما تلاقى ديمقراطيه فى الحوار
و هوا كدا عاجبك عاجبك مش عاجبك هتاخد بال ......... مصاصه
و ده بيتضرنا لطريقين
و هماالاول// اننا نقلهم حاضر و منعملش اللى هما عايزينه
و ده انا بعتبره انى باخد ناس اكبر منى على اد عقلهم و اظن ده غلط
االتانى// اننا نقووووول لااااا و نعبر عن راينا بس الصراحه بالنيسبه للاجيال القديمه دى
التعبير عن الراى يعتبر قله ادب و ابقى متربتش لاما اجى اناقش حد
هوا المفروض اقول حاضر و بس و لا ايه هوا شخصيتنا اتمحت للدرجادى
مطلوب منى ازاى ابقى راجل يتحمل المسئولييه
و انا دلوقت محجوب عنى انى اقول رايى فى ابسط الامور
بشوف المشكله دى بتواجه ناس كتير فعلا
مستنى ارائكو فى المشكله دى
و هل بتواجههك
و لو لا هل بتلاقى حد يسمعك و يناقشك فعلا؟
لو بتواجهك المشكله دى
هتبقى بجد اخرتها وحشه اوى

Thursday, August 7, 2008

ياريت تدعوووووووووولى


ازيكم ياجماعه


عاملين ايه والله وحشتوونى كتير


اعذرونى عن انقطاعى عن التدوين


اللى جه فجاه دا بس والله غصب عنى


معلش اصلى داخل على مرحله جديده كدا


ناوى اعمل حاجه معينه وعاوزه تركيز اوى



ياريت تدعولى لانى بجد محتاج دعواتكم دى



وانا طبعا هفضل متابع مدوناتكم مش هنقطع عنها



بس هنقطع عن الكتابه فقط



اعذرونى


هرجعلكم فى اقرب فرصه

Sunday, July 20, 2008

عيد ميلادى على سن ورمح



ازيكم ياجماعه
عاملين ايه
بخير

الحمد الله


انا حبيت اجى واقولكم كدا خبر ع الماشى
وهوه النهارده عيد ميلاد
وعيد ميلاد الليله مين
طبعا
عيد ميلاد المواطن الزهقان
يعنى عيد ميلادى انا
هنغنى وهنقول مع بعض
عقبالك يوم ميلادك لما تنول اللي شغل باااااااااااااالك يا احمد تيراراارا يا احمد تيرارا عقبااالك ياحمدا
يعنى تضربولى نااااااااااار



ا

نا عاوز كل واحد يدخل بهديته ايون اوعوا تنسوا

االهدايا


اوعوا تناموا عليها

انتم جايين عيد ميلادى

انا على سن ورمح




وكل سنه وانا طيب واحقق كل اللى بتمناه يارب


وكل سنه كدا تقربا من ربنا



يلا وادى التورته بتاعتكم عشان مايكونشى

ليكم حجه

يعنى اللى هيجى من غير هديه


هقفل باب المدونه


انتم حرين بقا



والساقع هجيبه لكن مااطمن على الهدايا





Thursday, July 17, 2008

ورجعت اهيس تااااااااااااااانى


احمد رجع يهيس يا رداله


اسمع يا مواطن عمرك حسيت انك نمله


ايوه نمله مستغرب ليه


سامعكم بتقولو اتجنن مش مصدقين


يعنى طب خليك مع المجنون ده للاخر واحده واحده كدا


هات مرايا وبص فيها هاتقولى خلقيتى وحافظها


عارف والله بس بص اوى ها شايف ايه


شايف نفسك طبعا ماهو دا الاكيد طبعا


شوف الى قدامك ده مين بصله كويس


هاتقولى بنى ادم هاقولك كداااااااااااااب


انت نمله ايوه نمله وصغيره اوى


الى فى المرايه ده شوف كدا بيعمل ايه طبعا ولا حاجة


انا وانت شىء صغير جدا بننداس تحت الرجلين ازاى يا فصيح عصركا وظهرك وعشاك


اما تتقدم لشغل وياخده صاحب الوسطه مع انك أنسب للشغل ده


اما تحس انك مبتعملش اى حاحة واخرك تقعد على النت او تتفرج على الدش


اما متلقيش شقه أوضه وصاله عشان تعيش حياتك


أما تشوف نفسك واد حليوه وعثول وحاطط جل بس عايش وخلاص


اما تحس انك بتقضى ايام عشان مستنى حاجة انتا مش عارفها


اما تنطحن فى الاتوبيسات وغيرك راكب لاند كروزر (مش حقد والله


)اقول ايه كمان اقولكم كفايه اصلى تعبت من التهييس


بس بعد كل ده شايف فى مرايتك ايه اكيد نمله بتنداس ولا حد سائل فيها


بس السؤال باه انت نمله بيضا ولا سودا


تهيييييييييس رسمى

Monday, July 14, 2008

نجحت ياجدعاااااااااااااااااااااااااااااااااااااان



ونجحت ياجدعان....وهدخل اعلااااااااااام

الغول الكبير انزااااااااااااااااااااااااح

اخير خلصت (بكسر ال خ)

ياااااااااااااااااااه احساس رهيب

هوه انا والله مظلوووم فى التعليم

بس الحمد لله

وعسى ان تكرهوا شيئا وهو خير لكم

بس الحمد لله

هدخل الكليه اللى عشت طول عمرى احلم بيهاااااا

كلية الاعلاااااااااااااااااااااااااااااااااااااااام

يااااااااااااااااااااااااه ع الاحساس

خشوا بقا وباركووووووووواشربوا الساااااقع


كله ياخد اللى فى نفسه

متتكسفوش

الفرح فرحكم











Sunday, July 13, 2008

فاصل من التهييس

سلامو عليكم جميعا

البوست ده بعمله وانا مهيس حبتين فاياريت تعذرونى على تهييسى
شارب؟ لامش شا رب ياخفيف
امال هقولك
كل اللى حنعمله شويه تهيس على ميه بيضه والسكر بره
وخليك كول وشيلك محمول
والله الموضوع حاجه سهله قوى:

هو عباره عن سؤال عبيط وبسيط كده على الماشى

بس قبل السؤال بقى ده الاهم
تسمعوا عن ناس كده مش عارف كان اسمهم بونوكيو
شايفك ايوه شايفك وهتقول ايه البونوكيو ده ؟؟
دول ناس كانو كل ما يكدبوا مناخريهم تطول مش لسانهم اه والنعمه زى مابقولك كده
متستغربش ده كان الحال بتاعهم يعنى

اجى بقى لسؤالى عشان نخلص من الليله دى بسرعه لو حصلنا كده لو كل ما نيجى نكدب مناخرينا تطول شويه
نكدب تانى تطول اكتر
يالهوووووووووووووووووز
ايه ياعم اللى بتقوله ده بقولك تخيل ياعم الامور

بردو انت لسه مش قولت السؤال بتاعك اصبر عليا ده انت فوق الفظيع ياخى
حاجه من الاتنين بقى
يانبطل كدب عشان نخاف على شكلنا ومناخيرنا
صعبه شويا صح
طيب ايه الحاجه التانيه ده انت رغاى قوى
الحاجه التانيه
نرضى بقى بالامر الواقع وتبقى مناخرنا كلها طويله ويبقى شكلنا مسخره
بس متخفش مش هتبقى انت لوحدك ماهو اللى جانبك كده برد
وونيجى نركب مواصلات ازاى بقى وناكل ازاى ولا ولا دى مناخير ياعم
واللى بيركبوا المترو يعملوا ايه ومحدش هيعيرك متخفش ما هو
اللى بيته من ازاز بقى ما يحدفش الناس بالخيار

لو بجد جالك انك تختار هتختار ايه واوعى تكدب لحسن ربنا يستجاب وتلاقى مناخريك عند جارك فى الشقه التانيه

مش قولتلك
تـــهـــيـــيـــس

Wednesday, July 9, 2008

قهوة البصريين

والله أنا مش عارف للأسف ايه المتعه فى قعده القهوه اللى بيسموها دلوقتى ( كافى شوب )
تلاقى كميه كافيهات بطريقه غريبه وكلها بيفصل بينها مسافات قليله جدا وبضع امتار
واحيانا مفيش مسافه اصلا وكلها للاسف مليانه
** طيب يمكن يكون كرسى القهوه مريح اكتر من اى كرسى تانى **
طيب ما تشترى كرسى زيه وتقعد عليه فى البيت ولا على البحر ولا فى اى حته
****يمكن علشان الشاى والقهوه **
الحمد لله علب الشاى والقهوه متوفره جدا فى المحلات وعلى الاقل حتضمن ان الشاى يكون نظيف والبراد كمان
مش زى براد القهوه اللى طلعت روحه من كتر الغليه **
ده حتى البراد بيكون لونه اسود من كتر الهباب اللى عليه ***
طيب يمكن علشان منظر العربيات اللى رايحه وجايه ممتع *****
طيب ما تقف فى البلوكنه مفيش عربيات بتعدى من عندكم طيب اقف فى الشارع شويه وخلاص ***
انا مش شايف اى متعه فى القهوه ديه خالص
زمان كانوا اصحاب المعاشات هم اكتر ناس بتروح القهوه دلوقتى تلاقى الشباب **
لكن شباب ايه دول عيال صغيره فى سن ممكن 11 سنة أو أكثر شوية ***
لا وايه كل واحد منهم ماسك شيشه وبتمنظر بيها كأنه عنتر شال سيفه ،
يخلص الشيشة من هنا ويقوم ماسك السيجارة ويقعد ينفخ فى الهواء
ليه كل دا
ربنا يحمى شباب هذه الأمة ويهديهم الى أنفسهم ويشغل وقت فراغهم بكل ماهو مفيد أو نافع

Saturday, July 5, 2008

اطلع من واجب الثانويه اجى الاقى واجب مستنينى


واجب لازم بقا نعمله
جايلى من
حبيب قلبى

حازم*cold air*
الزمنى بيه لانى لسه راجع بقا بعد مدة غياب
وقاللى عشان الناس تعرفك اكتر واكتر
قلتله انا تحت امرك اعمله ايه

والواجب دا عباره عن
الأول : اذكر 16 صفة من صفاتك
مستعجل ليه هتشوفهم تحت
الثاني : مرر الواجب لمن تحب
امرر الواجب دا لكل اللى يدخل المدونه وعاوز يجاوب عليه
هعمل بقا زى حزووووووم


ومن صفاتى اللى مفروض اقولها
1/عاطفى ورومانسى لدرجه كبيره
2/اعشق الجمال والتامل والهدوء
3/احب الخيال ومن الصعب ان اشعر بالوحده
4/ارتبط بجو المنزل وافضل البقاء فيهه اذا كان هادئا
5/شجاع احب المغامره
6/اجمع بين النقيضين الطيبه الشديده والشر الشديد
7/مكافح بقوه حتى يتحقق النصر
8/غير منظم بعض الشىء وممكن اكون متردد بس مش ل الاوقات
9/احب الاطفال واللعب معهم
10/ارى سعادتى فى مساعدة الاخرين
11/احب ان اكون قيادى فى المواقف المختلفه
12/الساكت عن الحق شيطان اخرس فلا اخاف فى الحق لومة لائم
13/مستوى طموحى مرتفع واريد ان اصل لابعد الدرجات
14/مستوى ثقتى بتفسى كبير ولا يصل للغرور بل اثق فى قدراتى على انجاز العمل
15/افضل الصمت فى احيانا كثيره كى اضع الكلام فى مكانه المناسب
16/احب الحياه واقتنع لاياس مع الحياه ولا حياة مع الياس
الواجب دا عاوز اكتر من 16 بند لان فى صفات كتيره
بس يلا دا اللى استخلصناه
اقراوا كدا بقا
وقولولى رايكم

Thursday, July 3, 2008

وتانى تانى تانى هنروح للتدوين تانى

ورجعنا مع بعض مره تانيه
وخلصنا من الثانويه وقرفها
وان شاء الله خير
وهندون وهنشتغل شغل عالى
استنونى بقا
عشان نعمل شغل عاااااااااااااااااااالى

Monday, May 19, 2008

اجااااااااااااااااااااازه



ياجماعه دى حته من منهج التاريخ بتاعى شفتوا بقا مبارك عمل اللى محدش قدر عليه ازاى

يعنى حقق مبدأ مبارك مش هتقدر تغمض عنيك


طبعا فى حركه التعليم الاخيره دى هيطور

كل حجاه فى المناهج الا الحته دى


وبكره نشوف


انا حبيت اجيبلكم الكلام دا اقولكم بيه ان

دا ختام لبوستاتى فى المدونه قبل الامتحانات

امتحانات الثانويه بقا

البعبع الكبير

يعنى البوست الجاى فى شهر 7 دا لو محصلشى حاجة تخلينا نكتب بوست جديد

هتوحشوووووووووونى

وارجوكم دعواتكم






Tuesday, April 29, 2008

قاموس طبائع الاستبداد

بم ان المدونة شعارها رسالة لازم ناديها لكشف الفساد
ورفع الاستبداد يبقى لازم نعرف ايه هوة صور الاستبداد دا
فاحنا قولنا نعمل قاموس الاستبداد
شوفوا معانا
*لما تنطق كلمة وتتحكام والامن يجيبك وتخش محاكم وتاخد حقك شلاليت وملاكم يبقى دا اكيد طابع استبدادى
*لما تلاقى شعب بلادك 90%عايشنها فى كربو10 الباقية نازلين فيها نهب يبقى دا اكيد طابع استبدادى
*لما تلاقى احزاب كتيرة عايشين فى تعاسه مشاكلهم هم تملا الكراسة والحزب الحاكم ولادين ولازمة ولاحتى كياسة يبقى دا اكيد طابع استبدادى
*لما تلاقى كل شوية يعملوا رقعة فى الدستور عشان يفصلوه على مقاسهم يبقى دا اكيد طابع استبدادى
*لما تلاقى صحفى ف سجن يبقى دا اكيد طابع استبدادى
*لما تلاقى سياسى معارض معروف باخلاقه الطيبة وكفاءته السياسيه فى سجن يبقى دا اكيد طابع استبدادى
*لما تلاقى مدون اختفى من بيته عشان كلمه قالها او حمله دعالها وف الاخر نلاقيه فى المعتقل يبقى دا اكيد طابع استبدادى
*لما تلاقى واحد ف المعارضة يقول انا مالى غيرى عمل ايه عشان خايف من قلم ينزل عليه من مخبر او بيه يبقى دا اكيد طابع استبدادى
*لما تلاقى واحد داخل ع النت وخايق يقول كلمه ليكون حد شايف ويكون فى خبر كان يبقى دا اكيد طابع استبدادى
*لما تلاقى عضو فى الحزب الحاكم متورط ف قضية ولازم يتحاكم ويطلع منها زى الشعرة م العجينة يبقى دا اكيد طابع استبدادى
*لما تلاقى عضو ف الحزب الحاكم ياخد قروض ويهرب بره ومحدش يعرفله طريق جره يبقى دا اكيد طابع استبدادى
*لما تلاقى مظاهره سلميه حواليهامن مركزى يضرب قنابل مسيله للدموع ودخانيه يبقى دا اكيد طابع استبدادى
*لما تلاقى شاب ف ايده ملبش وعصاية على دماغه من عسكرى امن مركزى يبقى دا اكيد طابع استبداد
*لما تلاقى محاكمة ناس عادية تبقى عسكرية يبقى دا اكيد طابع استبدادى
دا اللى وصلنا ليه وتم اضافته فى القاموس
اللى بنحاول نجمعه من عقل كل مدون فاللى عنده اى طابع استبدادى
يضيفه على طول
ومتنسوش شعارنا
يبقى دا اكيد طابع استبدادى

Thursday, April 24, 2008

بلال دياب طالب جامعة القاهرة الذي تحدث إلي رئيس الوزراء: خشيت المبيت في المنزل أنا وأسرتي.. وأناشد الرئيس التدخل لإنهاء المهزلة التي تعيشها مصر






ماورد على لسان بلال دياب فى المصرى اليوم





كنت خائفا وفي حالة رهبة شديدة لكن إيماني بما قلته شجعني علي مواجهة رئيس الوزراء الدكتور أحمد نظيف، أثناء اللقاء الذي نظمته جامعة القاهرة أمس الأول، بمناسبة الاحتفال بمئويتها، لكنني بعد العودة للمنزل خشيت المبيت فيه أنا وأفراد أسرتي».
بهذه الكلمات بدأ بلال دياب، الطالب بالفرقة الرابعة بكلية الآداب جامعة القاهرة، ومن الطلاب الليبراليين لحزب الغد حديثه لـ«المصري اليوم»:
قال بلال: دخلت إلي القاعة بصعوبة شديدة بسبب مراوغات مع الأمن وكنت قد علمت من أحد زملائي بوجود الدكتور نظيف بالجامعة قبلها بيوم، فذهبت للجامعة في الساعة التاسعة صباحا وذهلت من الحشود الأمنية الموجودة،
وكنت أنوي مجرد مقابلته أثناء افتتاحه المكتبة لإعطائه ورقة أطالب فيها بالإفراج عن الشباب المعتقلين علي خلفية أحداث ٦ أبريل وكتبت فيها «مصر دولة مدنية حرة» وذيلتها باسم طلبة مصر، لكني فشلت بسبب حصار الأمن لموكبه.
ثم حاولت دخول الندوة، فقابلني قائد حرس ـ وهو يعلم هويتي ـ وقال لي «إيه اللي جابك هنا؟».. فقلت له عايز أحضر الندوة، فرد علي «ماينفعش تدخل»، فرددت عليه «إحنا مش هنشاغب وإحنا ليبراليين علي قد حالنا»، حيث كان معي اثنان آخران من زملائي، فرد علي «اذهب إلي كليتك»،
وأثناء رجوعي للخلف صادفني وفد من اتحاد طلاب كلية التجارة كان في اتجاه دخول القاعة، فدخلت وسطهم إلي أن وصلت داخل القبة لكنني فشلت في دخول الدور الأول لقاعة الاحتفالات لأنني لست عضوا بالاتحاد، ووجهوني إلي الدور الثاني وبعد جلوسنا نبه المستشار الثقافي لرئيس الجامعة علي أن المداخلات ستكون علي ورق سيوزع علينا، لكننا فوجئنا بتوزيع الورق أثناء الندوة علي الموجودين بالدور الأول فقط،
وهم الوزراء والصحفيون وطلاب الاتحاد ولم يقوموا بتوزيع أي أوراق علينا، وأثناء حديث رئيس الوزراء عن إساءة استخدام الشباب للإنترنت، قاطعته بصوت عال «مصر حزينة يا ريس، خيرة شباب مصر في المعتقلات.. يا ريس عايزينك تفرج عن شباب معتقلي ٦ أبريل.. الشباب دول ياريس اللي وقفوا معاك في محنتك ودافعوا عنك في مؤتمر دافوس الاقتصادي العام الماضي».
ثم قلت له: «ياريس عايز أقول لك حاجة واحدة بس».. فابتسم وقال لي «قول» قلت له «ياريس التعليم زي الفل والجامعة زي الفل ورغيف الخبز موجود.. والديمقراطية موجودة.. والحرية مطلقة».. واختتمت «ياريس افرج عن مصر افرج عن مصر يا ريس».. ثم جلست في مكاني.
ورد علي قائلا: «حاسس في نبرتك بالسخرية ولكن المفترض من الشباب أن يعبروا عن رأيهم عن طريق قنوات سلمية» وحول دفة الحديث للدفاع عن سياسته.. وعلق بلال: «أي قنوات سلمية أكثر من النت؟».
وبعد انتهاء الندوة حاول اثنان من أفراد الأمن بزي مدني إلقاء القبض علي من أمام «القبة» لكنهم فشلوا لأن زملائي أحاطوا بي ودافعوا عني.. لكن بعد ذهابي لكليتي نجحوا في إلقاء القبض علي واحتجزوني داخل غرفة قائد الحرس للاستدلال علي هويتي.
وفي نهاية حديثه وجه بلال رسالة إلي رئيس الجمهورية وناشده التدخل لإنهاء المهزلة التي تحدث الآن في مصر ومحاولة إقصاء حزب الغد من العملية السياسية في مصر،
وقال «إن شباب الغد اللي أغلبهم موجودين في السجون هم شباب ليبرالي يدعو إلي دولة مدنية، وإذا لم يجدوا شرعية حزبية تحضنهم فسيتجهون إلي التطرف»، ووصف بلال أسلوب الجامعة في قمع الأنشطة بأنه سجن صغير داخل سجن كبير




ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
تعليقى بقاـ
الطالب دياب يوجه أسئلته لنظيف "الجامعة زي الفل، والعملية التعليمية زي الفل، ورغيف العيش موجود، والحديد موجود، والديمقراطية موجودة، طيب مصر حزينة ليه يا ريس؟!".. تعليقات ساخرة فاجأ بها بلال نظيف
مين فينا شاف فيديو بلال او الكلمات اللى صرح بيها


ومتهزش من جواه

مين فينا محسش ان بلال هوه نفسه اللى بيتكلم يعنى بيتكلم عنى وعنك وعن

شباب مصر المطحون ياجماعة بجد بلال دا جامد



الله اعلم ايه اللى هيحصلك

شارل ديجول لما مسك حكم فرنسا قال انه فرحان بشباب فرنسا

والكلام دا مش عشان هما ساعدوه لا دا عشان

هما اعترضوا عليه وقالوله لا وبكد اطمن على مستقبل فرنسا لان فى اللى يعارض ويقول لا على اى حاجة غلط

واحنا هنا طبعا بنفرح بالشباب بس بنعاقبهم

ونخبيهم فى السجون لوقت عوزة

الله يكون فى عونك مش عارفين ايه اللى هيحصلك من الكلمتين اللى فضفضت بيهم همك وهم شباب مصر اللى زهقان زيى

واطمن يابلا احنا معاك

Tuesday, April 8, 2008

حلم عايزه يتحقق

هيسال كتير ايه هوه الحلم دا وهرد وهقول لهم عايو افتح قهوة
انا عارف ان فى ناس كتير من اللى هيقروا الكلام دا هيضحكوا وهيسخروا من البوست واحتمال منى انا شخصيا
لكن بجد عايز افتح قهوة اى نعم ان القهاوى فى الايام دى ايام البطالة بتجيب فلوس بالهبل(اللهم مالاحسد لااصحاب القهاوى)
بس انا عايز افتح قهوة غير قهاوى الايام دى انا عايز ارجع قهاوى زمان وجانى دلوقتى شعور ان كتير منكم بداوا يفهمونى
طبعا مش هيقعد عليها اى حد لان اللى هيقعد عليها ناس ليهم صفات معينة
هتضم رجال السياسة والادب والثقافة والفن وهيكون فى منازلات شعرية وثقافية
مش منازلات فى قرقرة الشيشة وهيكون فى ندوات فى جميع المجالات مش ندوات فى سماع الافلام واللعب
وكمان فى مناقشات سياسية سخنة ع الوضع المصرى(لاالقهوه اللى بيقعد عليها ا/محمد عبد القدوس)
وضيف على كدا ان هيتمثل فيها مكان لالتقاء الاجيال وصراعهم مع بعضهم
وكل واحد فيهم بقا هيحاول الدفاع عن افكار بيؤمن بيها
فتستفيد الاجيال الجديدة من السابقة
وتتفهم الاجيال السابقة واعليه الاجيال الجديدة
بأختصار كدا هتكون مركز ثقافى بس بصورة شعبية وبين الناس بس
بقا اللى مش طالب للثقافة او بمعنى تانى اللى عايز يضيع وقته وخلاص
مالوش مكان فيها مع الاعتذار لمعظم شباب مصر
وعلى انغام اغانى حليم والست هتتفتح القهوة والا مش هتكون قهوة زمان
وبكدا هنعيد قهاوى زمان اللى مليانة خير
مين بقا اللى هيدخل معايا شريك
يتصل بيا على تلات صفار صفرين صفر وهتلاقى واحدة تقولك من فضلك تاكد من الرقم المطلوب

Monday, March 3, 2008

رباعيات شرقاوى

مصر ياامه يابهية بناكل فول وطعمية
ولاعمر ف حياتى اكلت اكلة شهية
انا نفسى فى مرة يدخل بيتى حاتى
ويعمل اكله بس يبعد عن التقلية
*************
مصر يابلدى فى ناس كتير بتهينك
وهما فى الاصل من قلوبهم شايلينك
اصحى يابلدى دول ف بطونهم بالعينك
واحنا ماعلينا غير ندعى ربنا يعينك
************
محتار يااهل فى قوت والاسعار بقت فوق
مش راضى الفقر يموت وانا للحمة فى شوق
طب نعمل ايه حتى العدس بقينا ماندوق
عايشين زى مايكون على رقبتنا طوق
****************
الحياة بقت صعبة والاسعار فى العلالى
حاسين كأننا فى غربة وديما على طول بنلالى
ومهما بعتى يابلدى هفضل برده شارى
ان كنت عليكى غالى سامحينى شكيت احوالى
************
بعلو صوتى ناديت ولنداء الوطن لبيت
قاللى اعملك بيت قلتله افهم ياريت
قاللى حررنى م الايادى ايادى الطغاه ونادى
انقذوا بلدكم وانقذوا الوادى م السرقة والنهب اللى ف بلادى
***************
مخنوق مش عارف مالى عاوز افضفض باللى جوايا
الناس بتفسر غلط حالى والله اعلم بالنوايا
مش عارف اعمل ايه مش قادر ارفع الرايه
هقاوم لحد ماتعب بس نفسى تعبت معايا
*************
(مقتبسه)
بنسافر ونبعد ونهاجر ونبعت فلوسنا دولار او ريال
ودا كله وف الاخر عشان نربى العيال
احسن مانقعد وننصب وننهب ونسرق تلال
محتارين نعمل ايه دلونا دا اخرتنا هنلحس نعال
**********
ياعينى ع الشباب مش عارفين قيمة الكتاب
مضيعين حياتهم والكتب ورقها داب
بكره يندموا ويعرفوا ان السبيل هوة الكتاي
ويقولوا امتى الشباب يرجع بعد ماشعرهم شاب
**********
الدنيا كدا بس لازم تتعاش
حياتنا كدا بس ماتروحش بلاش
فيها الحاجات الحلوة عمرنا ماننسهاش
وفيها المرة نرميها ومنشلهاش
***********
مصر ياامة يامحروسة لازم تلبسلنا الطرحة
لازم نديكى بوسه عشان نشوفك ف فرحة
ونفرح بيها ونعلقها فى صدورنا وسام
ونقول للناس دى فرحة مصر بلدنا الحره
********
انا نفسى فى عود اعزف على ماساتى
عذابى ملوش حدود عايز اكشف عن اهاتى
عايز اقول للناس عايز اثبت ذاتى
فى دفاتر اشعارى هدون معاناتى

Twitter Delicious Facebook Digg Stumbleupon Favorites More