Saturday, July 28, 2007

رسالة هزلية الى الرئيس


بسم الله الرحمن الرحيم
بعد حمد الله والصلاة على نبية فانى ارسل خطاب الى رئيس الجمهورية محمد حسنى مبارك اناشدة بكل ذرة من الرجولة تجرى فى دمة ان يخلصنا من الشبح الذى يطاردنا بأسم الاخوان المسلمين فهم السبب فى كل شئ سيئ فى دولتنا فهم السبب فى سفاح المعادى وهما وراء احتلال العراق وعلى فكرة الدكتور مصطفى الفقى قال ان امريكا وايران والقاعدة مسئولين عن مقتل السفير المصرى وبكرة يكتشفوا ان الاخوان مشتركين فى قتلة واللى اكتر من كدة اكيد ان موجة البرد اللى عدت وموجة الحر الشديد اللى احنا فيها من تنظيمهم واكتر واكتر انفلونزا الطيور كان هم اللى دخلوها مصر لان الامام حسن البنا مش كان بيحب الفراخ وتقل دم العيال اللى فى ستار اكاديمى مخطط اخوانى أصلهم إرهابيين وعايزين يكرهوا الناس في الفن
وهم اللي أعدموا صدام
وهم اللي عملوا مذبحة حلابجة أصلا
وهم اللي عملوا كارثة تسونامي
وهم اللي طقشوا القطارات في بعض
وهم اللي ربطوا العبارة في حبل وشدوها قامت غرقت
الضفادع البشرية بتاعتهم هي اللي سلتت العبارة في البحر
أصله تنظيم إرهابي إرهابي
وهم اللي عملوا السحابة السودا
وهم اللي بيحرقوا الرز
أصل سيد قطب ما كانش بيحب الرز
وهم اللي غرروا بأولمرت وخلوه يضرب لبنان
وهم اللي خطفوا شاليط
وهم السبب في هزيمة سبعة وستين
وتاريخهم أسود
هم السبب في زلزال اتنين وتسعين
وهم السبب في السيول
والقاضي اللي حكم ببرائتهم مش عارف مصلحته كويس
ومسيره يراجع نفسه ويعرف إنه غلطان غلطان
ويندم على عملته السودا
هو أصله مش عارف الناس دي لو خرجوا
بعد ما اتسجنوا واتبهدلو
وفلوسهم اتصادرت
ممكن يعملوا إيه؟
دول ممكن يروحوا البيت ويناموا
ولعلمكوا لما بيناموا هيزعجوازوجاتهم
وممكن طفل رضيع ما يعرفش ينام كويس
وممكن يقوم مفزوع من شخيرهم
وممكن الفزعة دي تجيب له القلب
أو السكر
أو ضغطه يعلا
وساعتها، ح يعيش طول عمره بمرضه
وممكن مرض القلب ده يخليه ما يعرفش يتجوز
وعيل من العيال دووول يطلع إنه يقرب للقاضي اللي حكم ببراءة خيرت الشاطر وزملائه
وفي اللحظة اللي ح ينهار فيها القاضي
يجيله صوت ضابط الأمن وهو بيقول له : كما تدين تدان يا سعادة القاضي
شفت ياسيادت الريس هما عملوا كل دة وعاملين شعارهم الاسلام والاصلاح طب وفين الاصلاح دة حضرتك هو الاصلاح كلة انت اللى عرفت الناس معنى الديمقراطية واصلاحك كتير فى البلد فرص العمل كتير للشباب ورغيف العيش كبير وموجود ومن غير منقف فى الطبور والمواصلات فاضية والاتوبيسات كتيرة والاسعار رخيصة جدا كتر خيركم والله ..... ونأمل انك تورث الحكم لابنك جمال نعم الذرية الحاكمة ونحن بئس المحكومين احنا اللى بنعكنن عليكم احنا مالنا والرئاسة
وشكرا ....

0 التعليقات:

Post a Comment

شوف انت عاوز تقول ايه

Twitter Delicious Facebook Digg Stumbleupon Favorites More