كلام مجانين

- -->

بما إن الكلام كلام مجانين فأنا هكلمكم بالعامية وليس بالفصحى لأن مفيش واحد مجنون هيكلم بالفصحى تعرفوا أنا اتجننت ليه زي ما كلكم اتجننتم هتقولوا إحنا مش مجانين ، أقول لا كل المصريين اتجننوا والدليل على كده إن مفيش حاجة في البلد صح الكل غلط ومش ممكن العاقل يعمل كل حاجة غلط، ولكن الغلطة مش غلطتكم الغلطة غلطة اللي جننوكم ، هتقولوا إحنا متجنناش ولا في حد يقدر يجننا أنا أسألكم سؤال! فيه يوم بيعدي في مصر من غير متحصل مصيبة وكمان مصايب؟ وحضرتك لما تسمع عن المصيبة دي بتقول إيه ؟ مش بتقول والله حاجة اتجنن ، تخيل واحد بيقول الكلام دا كل يوم وبيسمع عن المصايب في البلد كل يوم بالتأكيد مرة في مرة هيتجنن ، فيه واحد يقول لي والله أنا بقيت بسد ودن بطين وودن بعجين ، أقول له برضه إتجننت لأن مشاكلك في البيت بالتأكيد هتجننك ، هتأكل العيال منين؟ من شغله واحدة؟ ولا من شغلتين؟ ولا من 3 شغلات؟ المهم إنت بتشتغل 24 ساعة عشان تأكل ولادك ، وفيه واحد شغال 24ساعة مبينمش ممكن نقول متجننش؟ ولو متجننش ولاده اللي مبيشوفهومش ولا بيربيهم بالطبع هيعملوا حاجات هتجننه المهم في النهاية هيتجنن ، هتقولوا لي لو اعتبرنا كلامك دا صحيح بالنسبة لنا لكن فيه ناس مش مجانين ، هقول لكم مين؟ هتقولوا لي المصلحجية اللي جننوا الناس ، هقول زي مين؟ زي مثلاً لجنة "السياسات" قصدي لجنة "البطيخ" بالمناسبة أنا بقول لجنة البطيخ لأني كل ما أروح شادر البطيخ في بلدنا بافتكر الناس دول لأن كل حاجة بقت بطيخ ، نرجع لموضوعنا وأرد عليكم إن الناس دول وصلوا لقمة الجنون لأن مصالحهم جننتهم وقلقهم على مصالحهم جننتهم اكتر ومن كتر الغلطات الواحد فيهم معدش بيميز بين الغلط والصح ، وأسالكم هو في حد عاقل بيعمل كل حاجة غلط؟ طب يعمل مرة واحدة حاجة صح عشان منقولش إنه إتجنن .
المهم! الحاجة اللي إتجنن أكتر إن الناس دول ما بيشبعوش من 26 سنة بيخربوا في البلد وبرضه أملهم كبير الغريب ، إنك تلاقي عندنا ريس وريس موازي وحكومة وحكومة موازية تلاقي جمال بيه بيزور المحافظات ومعاه شلة رجال الأعمال من الوزراء وكمان مجموعة كبيرة من لجنة البطيخ ، أنا مش عارف مناسبة الزيارات إيه وبأي صلاحيات والوزراء دول تابعين لمين؟ هل هم رئيسهم النظيف ولا البطيخ ؟ حاجة تحير! ودول عايزين من الناس إيه؟ مش كفاية اللي عملوه فيهم , ولكن اللي أنا فكرت فيه إن الراجل مستعجل على الكرسي أوي هيتجنن عشان يقعد على الكرسي رغم أن الكرسي بتاعه دلوقت هو اللي ممشي كل حاجة ومحدش بيقدر يتكلم لا كبير ولا صغير ، لكن معرفش هو مستعجل ليه ، وبما إن الكلام كلام مجانين ومحدش دلوقت لا مثقف ولا غير مثقف قادر يتنبأ بالسيناريو اللي جاي إيه حتى لو إستخدموا الجن فأنا براحتي أتنبأ وأقول اللي أقدر أقوله أنا حر ، بأقول بما إن الراجل مستعجل على الكرسي وكل شىء دلوقت بيمشي بأمره ، فانا باقول والتجارب تكررت إن اللي حصل في دولة خليجية من كام سنة بين الأبن وأبوه هتحصل في مصر لأن الناس دول مصالحهم فوق كل شيء خربوا البلد وبعد ما خربوها باعوها معندهمش عزيز طبعاً هتقولوا دا تفكير مجانين أقول لكم نعم ما أحنا أتفقنا من الأول إنه الكلام كلام مجانين مع اعتذاري للعاقلين وشعبان بيه عبدالرحيم.

Posted in: