رسـالـه الـى عـزيـزتـى مـــصـــر

مصر العزيزه

انا شاب من ضمن شباب كتير بيحبك وصل حبهم لدرجة العشق لدرجة انهم يموتوا عشانك
لدرجة انهم يضحوا بكل حاجه عشانك .... لدرجة انهم بيقدمولك عيونهم وميشوفوش عشان تشوفى احبابك
وتعرفى مين بيحبك ومين باعك

عزيزتى مصر

احنا شوفنا ان فى ناس كتير بتهينك .. ومن قلوبهم شيالينك .. شوفنا ناس بتاكل فى خيرك ... شوفنا ناس بتبيع فى طينك
شوفنا ناس كتير بتخرب لحد مابقيتى محلك سر
شوفنا ناس كتير انتى مش هماهم وكل همهم بس نفسهم ... ويحوشوا ف بطونهم م السطله اللى انتى ادتيها لهم

عزيزتى مصر

شفنا انتهاك كبير للى بيحبك ... للى بيقول كلمة حق فيكى ... للى بيقول < لأ > علشان خاطر عنيكى
شفنا فيكى مفيش مكان للفقير ولامكان لموظف عنده ضمير ... كلهم بيتاكلوا ف الرجلين وذنبهم ان فيكى الكبير كبير

حبيبتى العزيزه مصر

لما شوفنا دا كله فيكى .. وحاجات غيرها كتير تأثر عليكى
ومفيش ولا ( عيش ولا حريه ولاعداله اجتماعيه ) قررنا
نـــــــــــــــصرخ
بأعلى صوتنا ونقول << لأ >> وانقذوا مصر
أنقذوا مصر م الطريق اللى هى ماشيه فيه ... طريق الحرامى والبيه

عزيزتى مصر

ف يوم 25 يناير 2011
جمعنا نفسنا شباب بيحبك ... ونزلنا الميادين نهتف بأسمك
<< ياأحلى اسم فى الوجود يامصر >>
<< الشعب يريد اسقاط النظام >>
<< عيش - حريه - عداله اجتماعيه >>

قولنا لكل حاجه غلط لأ .. وعلينا وعلينا الصوت .. عشان الحق جوانا عمره ماهيموت
قولنا لازم نجيب حقك وقد كان .. وقعنا الراس الكبير والأعوان .. وديول نظامه .. والواد الصغير البهلوان
اللى كان نفسه يبقى ريس ... ويخرب فيكى كمان وكمان

عزيزتى وحبيبتى الغاليه مصر

دا كله بعد ماناس كتير كانت مابينا ضحوا بروحهم وقدموها ليكى عشان تعيشى
ناس كان شايلين كفنهم على اديهم وبيقولوا تحيا مصر
ناس وقفت فى وش الشرطه اللى كانت للأسف ضدنا عشان وزيرهم اللى كان بيلحس نعل جزمة كبيره

ولارجالة البهلوان ... اللى نزلوا ف كل الميدان .. كل واحد فيهم قال ايه راكبلى جمل او حصان
أصل الامر صدر لهم يخلو الميدان ... هأأوأو يابلهلوان
بس ايه دا كان بعده

والشرطه اتسحبتوا وأستخبوا ف بيوتهم ... والاقسام والمراكز ولعت من جبروتهم
اللى كان على ناسك ... والجيش نزل وقال احنا ياثورة مصر حراسك
وهتفنا وقولنا
<< الشعب والجيش ايد واحده >>
والمجلس العسكرى مسك البلاد ... وعمال يقول وعوود وبالثوره قد أشاد
قولنا خلاص البلد هتتحسن .. ونضفنا الميادين ورجعناها للأحسن

لكن الوعود صبحت مفيش ... ونلاقى ثوار بيتعملهم فيش
وكشف عذريه وقلة ادب بعد كدا متلاقيش
ووعود كل يوم وكلام ... والكلام بيسيح قبل ماانام

شوفنا احداث كتيره من مسرح البارون لماسبيرو لشارع محمد محمود لاحداث مجلس الوزراء
ويموت شهيد والتانى ... عشان شايفينك لسه بتعانى
ويموت علمائـك .. ويموت شبابك ... عشان حلمهم يفتحوا بابك
يفتح بابك للحريه ... ويشوفك طالعه لفوق طلعه قويه
من مينا لعلاء للشيخ عماد ... لعزه وسميره وست البنات
وغيرهما كتييير ياما
كلهم مش فارق معاهم ... يتهانوا ولايضربوا ولاحتى انه مات ... لكن نفسه يشوفك احسن بلد فى الدنيا
ويدوق طعم الحريه ف كل مكان فيكى
لكن برده العسكر بيخلف وعوده ويوم ورا يوم بيزيد فى نقيضه
وكترت الاتهامات ... من خاين لـ عميل هيهات هيهات
عملوا كتير وقصروا ف حقوقنا
قصروا ف دم الشهداء ... ومبيحاكموش اللى كان السبب ... وبيقولوا كمان دول ابرياء
واللى زاد وغطى انهم اتبعوا نفس مناهج الكدب والخداع والرياء
وللأسف وقع كتير ومات كتييير م الورد اللى فتح ف جناينك
نحتسبهم عند اللى شهداء

وطلعت صرخات من الكنيسه والازهر
<< يسقط يسقط حكم العسكر >>
وقولنا من تانى راجعين ... عشان لسه يامصر شايفين ... ابنك مش واخد حقه .. وبيتهان وبيتسب له الدين

راجعين نقول للظلم لأ ... راجعين عشان مبقاش فيه سكات
راجعين يامصر لكل الميادين من تانى .. عشانك يامصر وعشانى .. وحق اللى مات

يا مــصـــــــــــر

يوم 25 يناير 2012
هنقول ...... الثوره مستمره
.. مطالبنا موجوده والحياه اعبائها بتكتر .. وكمان هنقول

<< يسقط يسقط حكم العسكر >>

ميعادنا يامصر يوم 25 يناير 2012.. بعد سنه من موجة ثورتنا الأولى هنقول
احنا لسه موجودين .. طول مافينا نبض هندافع عن حقوقتنا وحريتك يابلدى ليوم الدين
نازلين نقول
<< الثوره مستمره >>

ومتقلقيش يامصر ولادك موجودين

انا أسف يا مصر

انا عارف ان رسالتى طولت وقلبت عليكى مواجع كتير بس غصب عنى كنت لازم اقولك
ان ولادك لسه فيهم نفس ومصممين وصامدين عشان يدوقوا طعم الحريه
لسه فيهم مكان فى جسمهم للرصاص ... لسه فى جسمهم دم
ولأخر نقطة دم هيحبوكى ... ولسه رافعين رايتك لسه محافظين عليكى
احـــــنا ولادك يا مــصــر

يــــا مـــــــــصــــــــــــــر شكرا

ان قلبك اتفتحلى عشان اقولك الكلام دا كله ... بس ف نهاية رسالتى احب اقولك

<< بحبك يامصر لاخر نقطه ف دمى ولاخر نفس جوايا >>

Posted in: