Wednesday, October 3, 2007

هرنلك بس اوعى تفتح عليا

اوعى تفتح عليه ... ماذا لو قال أحد الأشخاص هذه العبارة قبل ظهور الموبايلات ....
يعنى من عشرين سنة مثلاً ... أكيد كنت هتحسبه يحذرك من أن تفتح عليه الحمام
أو تفتح عليه باب اوضته و هو بيغير هدومه ..لم يكن فى الحسبان وقتها
أن يكون التليفون ضمن قائمة هذه المحظورات ..
يعنى لو حد سألك ساعتها اوعى تفتح عليه التليفون ( قبل ظهور الموبايل )
بالطبع كنت ستتسائل .. أفتح عليه التليفون إزاي ... هو حنفية !! -
و الآن تبدلت الدهشة إلى عادة و أصبحت هذه جملة مستهلكه بين الناس و خاصة بين الحبيبة ..
تقولك البنت التى تحبها .. هرنلك بس إوعى تفتح عليه ، تبقى خسرتنى يا روحى لو فتحت تبقي خسرتني دقيقه بحالها -
و عندما تطلب منك الحبوبة ألا تفتح عليها فهذا ليس لأنها لا تحب سماع صوتك فى التليفون ،
و لكن لأن الدقيقة بالشئ الفلانى .. لأنها ممكن تكون بتحوش تمن الكارت من مصروفها ..
و ممكن كمان ما تاكلش عشان توفر ثمن كارت الشحن ، لكن تخلص رناته ..
أهو ده اللى مش ممكن ابداً !!! و الموبايل بين الحبيبة أصبح شيئاً هاماً و ضرورياً
رغم ان كلا الطرفين يمكن أن يكون موجوداً فى البيت معظم الوقت ،
صاحبنا عايز يحب و يقضى حياته رنات و كلما إزدادت رناته كلما كان معبراً عن هيامه أكثر
و لان الحبوبة ممكن تزعل لو ما رنش ... معنى كده إنه مش فاكرها ... يعنى مطنشها
و تقول فى بالها يبقى أكيد ناوى يخلعنى من دماغه أو شاف له شوفه تانية
و هكذا تصبح الرنة بين الأحبة وظيفة ضرورية لا تقل عن وظيفة كيلو الفاكهة
الذى يحمله الخاطب لخطيبته فى زيارته الأسبوعية فى المنزل و ذلك ليثبت بفاكهة المحمول إنه مش جلدة -
هذا بعد أن اعانه الله و قدر يخطب - و مزيداً من الإخلاص فى الحب
يحوش الحبوب كام رسالة عاطفية من بتوع الكمبيوتر يرسلهم للجو عشان تتبسط ...
صحيح ممكن تكون أمة لا إله إلا الله حافظة رسالته قبل ما يبعتها لأنها دارت على موبايلات خلق الله قبل كده ..
و لكنها إعادة صياغة عصرية و تكنولوجية لما كان يحدث قديماً عندما يستعين أحد المحبين بكتاب شعر ينقش منه كلمتين يخبطهم على الجواب إللى ناقله من كتاب ( 100 رسالة عاطفية ) و بعدين يبعته لحبيبته ..
بعد الموبايل كل إنسان أصبح متاحاً و مقتحماً أى حد تقدر تجيبه من أى حته
و البت اللى أبوها قافل عليها أبواب البيت و شبابيكه و حاطط عليها 100 قفل
تقدر تلاغيها و تلاغيك لو معاها موبايل ... فهو حتة حديدة صغيرة تقدر هى تخليه صامت
و تقرأ رسايلك و لو فى الحمام ،
ببساطة اللوعة التى كنا نستمع إليها فى أغانى أم كلثوم لم تعد موجودة . .
بدل ما تقعد تعذب فى نفسك أغداً ألقاك تبعت ( ماسيدج ) بالمضمون
و سيبك بقى من السهر و السهد و التنهيد ..
بدل ما تقف أدام البيت و تقلد صوت كلب أو فار ( و ده سيم متفق عليه طبعاً ) يوفر المحبوب
و لا انتو ايه رأيكو

27 التعليقات:

والله ياحمد عندك حق فى كل كلمه الموبيلات بقت شئ ضرورى جدا فى حياتنا مش من باب انه ضرورى بجد بس من باب التعود يعنى مش هنموت من غيره
اما بالنسبة لموضوع الحبيب والحبييه فهو نوع من التواصل برده احسن من مفيش خالص
مواضيعك لذيذه ياحمد
ربنا يوفقك
ساره طوبار

من اروع و الذ و افيد الاختراعات الموبيل
قبله كان علشان توصل لحد كانت الصدفة لازم تلعب دور مهم لكن دلوقتى فرقت بجد
و زى ما انت قلت للتواصل بين المحبين و لو انى ضد الرنات عمال على بطال و القلق ده ههههههههه
رسالة واحدة افيد من الف رنه ملهاش معنى
تحياتى لك و كل عام و انت بخير

ازيك يااحمد
اخبارك ايه
سورى بقالى كتير مدخلتش مشغولة شوية واليوم كمان بيخلص بسرعة جدا فى رمضان
بالنسبة للبوست مش عارفة ليه حاسة انى قريته قبل كده

اه افتكرت قريته فى شسلة الانس

ربنا معاهم الناس اللي بيتفتح عليهم دول
لكن عادي يعني زمان كان ممكن لكن دلوقتي أصلاً محدش بيفكر يكلم حد علشان لو فكر يرن عليه التاني مش فاضيله يبص ولا يفتح عليه

لاول مرة بالاسكندرية : دعوة لكل مواطن ولكل مدون حر: لحضور .............

ملتقي الدفاع عن سجناء الراي وحقوق الانسان
بالإشتراك مع ....
تجمع المدونين الطامحين في وطن عربي بدون سجين رأي واحد و بحضور نخبة من الصحفين والسياسين والمدونين
فرصه حقيقيه ليجتمع المدونين مع بعضهم البعض
ويعلنوا تضامنهم مع حرية الصحافه والكلمه في مصر

موعدنا : الجمعة 19 / 10

الساعه 5 بنادي المحامين بجليم الاسكندرية


ارسلها لكل المدونين عندك

سلام عليكم ازيك يا احمد
عارف انا فعلا بكره الموبيل رغم انة ضروري
بس فعلا ممل بالذات في موضوع الحبيبة دة
بتحس انة بقي شئ اساسي
ورنة تزعلك ورنة تفرحك
والله احنا بقينا ناس تافه قوي
سلام

صديقى العزيز مدونتك حلوة بجد واتمنى استمرارك فى النقد وبطريقتك السلسة هذه وما تنساش ترنللي وانا هاقفل وهاطلبك
رضوان آدم

سارة
شكرا على المرور
ومبروك المدونة

منة الله
فعلا عندك حق
رسالة واحدة افيد
من ميت رنة

ياسمين
الحمد لله اننا اطمنا عليكى
وكل سنة وانتى طيبة
وفعلا انتتى قريتي قبل كدا

ان شاء الله هحاول احضر
وهبعتها لكل المدونين اللى عندى

الاستاذ
والله عندك حق فى
كلامك دا

على رايك نماس تافهة اوى

الحمد لله انها عجبتك ياادام

اوعى

تفتح عليا


انا بقللك اهو

لا على فكرة الموبايل لية أهميتة مش شرط يعنى عشان الحبيب والحبيبة والله بس بجد بقى لية أهميتة عموماً موضوع الحب بتاع الموبيلات ونظام أوعى تفتح علية وكدة بقى حاجة لابد منها فى عصرنا هذا الى أنتشرت فية التفاهات والعقول الميتة
موضوعاتك حلوة أنا بقرأها على فكرة وبزور المدونة كتير بس ساعات مش بترك تعليق كمان الأفكار بتاعتها حلوة وبالتوفيق انشاء الله

طيب الحمد لله
ان المدونة بتعجب ناس

وبتزوريها كتير دا شرف ليا والله

سلام اله عليك
ههههههههه والله عندك حق فعلا
بس على فكره اتلوقت مش بيتقال كلمه اياك تفتح
و هموتك لو تحت عليا
زمان اللي هوه من سنتين افتكر ان الدقيقه كانت بجنيه و نص
و خطي انا جبته من 2001 كده ب ييجي 180 جنيه
الوقت تعالى اتفرج
مرمي على الرصيف ال2 ب 5 جنيه
الخطوط و الموبايلات على قفا من يشيل
و خد عندك الدقيقه ب 20 قرش و ادفع 5 جنيه و اكلم ساعتين ببلاش
يس حجات كتير قوي خلت الموبايل ده موضه قديماااا قوي
و اللي مش معاه الوقت جاهل

تصدق بابا جيه يقولي من كام يوم كده الراجل بتاع اليوسفي اللي اشتر من عنده كان ماسك موبايل كمان

الخضراتيه كمان
هههههههههه
ييييييي لكيت كتير كالعاده
يالله تحياتي ليك
.
زيــزي

اتكلمى يازيزى براحتك هوة الكلام بفلوس

السلام عليكم و رحمة الله و بركاته


شوف يا احمد الموبايلان فى وجهة نظرى أصبحت خطر على مجتمعنا

انا شوفت مهازل بتحصل بين الاولاد الصغيرين مش الى انت اتكلمت عنهم لا الى فى سن 12 سنه و لا الى فى الثانوية العامة ،، بجد شفت كوارث

و خصوصا مش الموبايلات العاديه الموبايلات ذات الكاميرات و الى طبعا فيها بلوتوث


من صور بنات و نقل للصور و رسائل حب و غرام


مهازل و كل دا السبب فيه المنافسه بين الشركتين الى خلت كل واحد شايل موبايل


الله المستعان


عموما موضوعك عجبنى و حبيت أرد و ان شاء الله اتابع المدونة

انا جيت اهوه يا ابو حميد
مدونتك جميله يا عسل
استمر يا جميل
ربنا يوفقك

كده تفتح عليا
كلمه تتقالي كتير جدا
اصلي ساعات بحركه لا اراديه افتح على طول عشان مبحبش اسمع الجرس كتير
بس خلاص مع الوهات الدقيقه نزلت التلت و مفيش مشكله

غريبة
بجد رد جميل
وبقوا 3 شركات مش
2بس

ايون كدا فرحتنى يااخى
نفسى اصحابنا كلهم يجو يااسلام
مش انت بس

ياه بجد
نزلت
مش ممكن

ههههههههههههههههههههههههههه

انا بقرا الكلام ده

و صحبة اختي داخلة بتقولها


فتحتي علية لييييييييييييييييييه ؟؟؟


بجد جميلة كل مواضيعك

ممكن اعلن عن مدونتك عندي ؟؟؟

شكرا

Post a Comment

شوف انت عاوز تقول ايه

Twitter Delicious Facebook Digg Stumbleupon Favorites More