جريدة الاهرام : فقدت اليوم جمهورية مصر العربية رجل من أخلص رجالها بذل حياته من أجل بلده
وشعبه , غابت الشمس التى طالما بعثت الدفئ فى قلوب المصريين , مات المبارك محمد حسنى مبارك
الاخبار : وقف الزمان و اهتزت ارض المحروسة وغيم الحزن على قلوب جميع المصريين بعد وفاة المخلص الامين مبارك
روز اليوسف : لن ننساك يا مبارك
التليفزيون المصرى : يذيع أغانى وطنية و نعى لوفاة الرئيس كل 5 دقائق و لقاءات مع الفنانين كله لابس اسود و دموعه على خده ينعى القائد العظيم و يشيد بأمجاده .. التليفزيون المصرى يعلن الحداد .. مافيش أغانى .. مافيش أفلام .. كله برامج حواريه تحكى أمجاد مبارك و أفلام تسجيلية و نفس النعى كل شوية ..
وجرايد المعارضه ايضا تنعيه على حياء و لكنها ايضا تسال ماذا بعد مبارك
و شايف خبر فى صوت الامة يتوقع قدوم جمال و كاتب من مبارك لمبارك يا قلبى لا تحزن
كل ده و اكتر منه هيحصل علنا و كلنا هنشوفه و نسمعه ... بس ايه اللى هيحصل من تحت لتحت
.. تليفونات بين المسئولين و الوزراء كله عايز يطمن على كرسيه و مستقبله .. كله عايز يخلى صفحته بيضاء علشان ماحدش عارف ايه اللى جاى ..
كمال الشاذلى يكلم صفوت الشريف يقوله ايه النظام يطمنه صفوت و يقوله العمليه فى جيبنا و الكرسي مش هيخرج بره الحزب ..
بس سيبنا نطبخها على رواقة ... تليفونات بين رجال الاعمال و الناس اللى فوق كلع عايز يأمنله ضهر يتسند عليه
ويحميه وقت اللزوم لو المستخبى بان
أسبوع و التانى مافيش تصريحات كله بيسأل ايه اللى هيحصل ... تشتد المعارضه و المظاهرات تطالب بانتخابات حرة
نزيهه و تندد بالتوريث .... تزداد الاعتقالات ... كل من يتكلم فى السياسة مصيرة الضرب و السحل حفاظا على أمن
البلد فى هذه الفترة العصيبة
ينزل خبر يعلن بدء الانتخابات بعد شهرين من تاريخه و اخر موعد للتقديم بعد أسبوعين بشروط كذا و كذا ... الكل
يعترض ازاى مش هنلحق .. لازم تمدوا الفترة و الشروط مستحيلة .. ترد الحكومة المؤقتة مصر فى حالة عدم استقرار
و مافيش وقت و اللى مش قادر يقعد على جنب .. مطلوب فى شهرين جمع ميزانية للحملة الانتخابية و تجهيز برنامج
النتخابى و تنفيذه .... ويتقدم الحزب الوطنى بمرشحه الجاهز جمال مبارك ... تثور المعارضه ... ازاى .. ظلم ..
كفاية .. كفاية ... يرد جمال انا مواطن مصرى من حقى الترشيح للرئاسة مثل أى احد من خلال النتخابات حرة نزيهة و
ليس توريث كما يدعي بعض الجهلة ... يتقدم للترشيح بعض الاراجوزات الديكور ..شوية بتوع مالهمش لازمة .. و
تزيد المعارضه و يزيد الضرب و السحل و الاعتقالات
وفى النهاية يفوز جمال مبارك بنزاهة و شرف ... و يلقى بعض الخطب الرنانة يعد فيها الشعب المصرى بالتغيير
و التقدم ... ناس تسقف ناس تعترض ناس تكبر دماغها و تقول احنا مالنا
وفى الاخر طلعنا شعب لمؤاخذة .... مختوم على قفاه ... وبكره نشوف
0 التعليقات:
Post a Comment
شوف انت عاوز تقول ايه